İdxal - ixrac əməliyyatları haqqında

2011-ci ilin doqquz ayında ölkənin dövlət və qeyri-dövlət təşkilatları və ayrı-ayrı fiziki şəxsləri 148 xarici dövlətlə 26,6 milyard ABŞ dolları məbləğində ticarət əməliyyatları aparmışlar. Əmtəə mübadiləsinin 4,3 milyard dolları MDB üzvü dövlətləri, 22,3 milyard dolları digər ölkələrlə həyata keçirilmişdir. 2010-cu ilin yanvar-sentyabr ayları ilə müqayisədə ölkə üzrə xarici ticarət dövriyyəsinin həcmi müqayisəli qiymətlərlə 7,3 faiz, o cümlədən MDB üzvü dövlətləri üzrə 27,5 faiz, digər dövlətlər üzrə isə 4,7 faiz çox olmuşdur. Xarici ticarət dövriyyəsinin 19,7 milyard dollarını Azərbaycandan ixrac olunmuş mallar, 6,9 milyard dollarını ölkəmizə idxal edilmiş məhsullar təşkil etmiş, 12,8 milyard dollarlıq müsbət xarici ticarət saldosu yaranmışdır.
Xarici ticarət əməliyyatlarının beşdə dörd hissəsindən çoxu (82,2 faizi) İtaliya, Fransa, Rusiya Federasiyası, Amerika Birləşmiş Ştatları, Ukrayna, Türkiyə, İndoneziya, Almaniya, Malayziya, Koreya Respublikası, Belarus, İsrail, Çin və Gürcüstan dövlətləri ilə aparılmışdır.